ठाणे : ठाणे महानगरपालिकेच्या एक लाख वृक्षारोपण कार्यक्रमाचा प्रारंभ राज्याचे सार्वजनिक बांधकाममंत्री तथा ठाणे जिल्ह्याचे पालकमंत्री एकनाथ शिंदे यांच्यार हस्ते व महापौर मीनाक्षी राजेंद्र शिंदे यांच्या अध्यक्षतेखाली आणि वित्त विभागाचे अपर मुख्य सचिव दिनेशकुमार जैन यांच्या प्रमुख उपस्थितीत एक जुलै रोजी शीळ येथे करण्यात आला.
महाराष्ट्र शासनाने वन विभागाच्या माध्यमातून एक ते सात जुलै या वन महोत्सवाच्या कालावधीत चार कोटी वृक्षारोपणाचा कार्यक्रम घोषित केला आहे. त्याअंतर्गत ठाणे महानगरपालिकेने सन २०१७मध्ये एकूण तीन लाख रोपे लावण्याचे नियोजन केले आहे.
शीळ येथील खरीवली देवी मंदिराच्या डोंगराच्या पायथ्याशी चार हजार आणि खरीवली देवी मंदिराच्या डोंगराच्या पाठीमागील भागात पन्नास हजार वृक्ष तसेच कौसा येथील मुंब्रा-बायपास दर्ग्यासमोरील डोंगरावर ४६ हजार रोपांची लागवड करण्यांत आली.
कार्यक्रमाला आमदार सुभाष भोईर, रवींद्र फाटक, उपमहापौर रमाकांत मढवी, सभागृह नेते नरेश म्हस्केय विरोधी पक्षनेते मिलिंद पाटील, नगरसेवक व शिवसेनेचे गटनेते दिलीप बारटक्के, महापालिका आयुक्त संजीव जयस्वाल, अतिरिक्त आयुक्त सुनील चव्हाण, उपायुक्त (मुख्यालय) संजय निपाणे, उपायुक्त ओमप्रकाश दिवटे, सहायक आयुक्त शंकर पाटोळे, अनुराधा बाबर, चारुशीला पंडित, दत्तात्रय देवरे, विजयकुमार जाधव, कार्मिक अधिकारी वर्षा दीक्षित, प्रदूषण नियंत्रण अधिकारी मनीषा प्रधान, क्रीडा अधिकारी मीनल पालांडे व इतर मान्यवर उपस्थित होते.
ठाणे जिल्ह्याचे पालकमंत्री एकनाथ शिंदे यांनी मागील वर्षी कौसा येथे स्वतः लावलेल्या वडाच्या रोपाचा वाढदिवस साजरा केला. या रोपाच्या संगोपनाबद्दल समाधान व्यक्त करून, त्यांनी मागील दोन वर्षांत लावण्यात आलेल्या रोपांचे संगोपन करण्याची जबाबदारी तेथील स्थानिक आदिवासी युवकांवर सोपवली. या युवकांना रोजगार उपलब्ध करून दिल्याबाबत त्यांनी समाधान व्यक्त केले. ठाणे महानगरपालिकेने आतापर्यंत केलेल्या वृक्षारोपणापैकी ८५-९० टक्क्यांपेक्षा जास्त रोपे जगवली आहेत. महानगरपालिकेने केलेल्या या कार्याबद्दल पालकमंत्र्यांनी महापालिका प्रशासनाचे आभार मानले.
या उपक्रमामध्ये महानगरपालिका अधिकारी, कर्मचारी, शाळा, विविध सामाजिक संस्था, खासगी संस्था आणि स्वयंसेवक यांनी मोठ्या प्रमाणात सहभाग घेतला. याकरिता ठाणे महानगरपालिकेमार्फत ठाणे व मुंब्रा रेल्वे स्थानकावरून मोफत बस सेवा उपलब्ध करून देण्यात आली होती.